Vestmannaeyjaför

Ég skrapp til eyja í gær þriðjudag í viðskiptaerindum. Það hefur alltaf verið gaman að koma til eyja þótt ekki séu minningarnar margar af sigrum minna manna í KR fyrirferðamiklar í þeim minningum. KR hefur oftast nær átt erfitt uppdráttar í eyjum og það líka þegar við vorum meðal bestu liða landsins. En mínar eyjaferðir einskorðuðust í 20 ár við slíkar heimsóknir.

Móttökur eyjamanna voru höfðinglegar og vorum við félagarnir drifnir í tuðruferð umhverfis Heimaey. Þetta var mikil ævintýraferð og stórkostleg upplifun sem vel er hægt að mæla með. Útsýnið til lands var stórbrotið með Eyjafjallajökul gnæfandi yfir sjóndeildarhringnum vel fylgt eftir af Heklu og Kötlu. Óhætt er að segja að eyjamenn búi við fegursta útsýni landsins að öðrum ólöstuðum
Fuglalífið í kringum eyjarnar er ótrúlegt, ég hef aldrei séð svona mikið líf nokkurstaðar á landinu ( hef ekki komið í Látrabjarg á varptíma).. hvert sem maður leit var lundi á flugi eða syndandi, álkur og langvíur.. múkkar , súlur og mávar. Allt bókstaflega iðaði af lífi.
Þegar inn í höfnina var komið aftur sá ég nokkra eyjapeyja vera leika sér að því að stökkva í sjóinn af KAP 2 íklæddir flotbúningum.. þetta væri óhugsandi í reykjavík.. þar mundi lögreglan og sennilega barnaverndarnefnd skipta sér af um leið..

Ég átti frábæran dag í eyjum og vonandi kemst ég þangað aftur sem fyrst.. já talandi um það.. vonandi mætir KR ekki eyjamönnum í eyjum í bikarnum, held að KR mundi ekki ríða feitum hesti frá þeirri viðureign.

Athugasemdir

[Sigríður Sigurðardóttir, 27.6.2007 kl. 18:57]

  Sá líka krakka, bæði stráka og stelpur stökkva af Kap, í minni síðustu ferð til Eyja núna í byrjun júní.  Er sammála þér að frjálsræði barna í Eyjum er enn töluvert meira en uppi á fasta landinu, og er það vel.  Man sjálf hvílíkt ævintýri var að alast þarna upp, og enginn fullorðinn að amast yfir því þó maður 10-12 ára, kæmi sjóblautur heim 2-3 í viku á sumrin.  Foreldrarnir gerðu þetta sjálfir á þessum aldri, og fannst þeir lítið geta sagt.